El 21 de Setiembre bien de mañana, cargamos el furgón y los coches, y partimos escontra La Casa d'Asturies de Alcalá de Henares. Un viaxe aprosimao de 500 kilómetros.
Fíxonos rápido'l viaxe, sobremanera a estos dos.
Yá nos esperaben na sidrería de La Casa d'Asturies pa comer. Cómese allí que da gustu, gastronomía asturiana de lo meyor. Comimos unos bonos platados de fabada pa recargar piles dempués del viaxe.
Acabante comer empezamos a montar l'escenariu, ¡casi nada!. Cables, altavoces, tecláu, batería…
Namás acabar fuimos a folgar un pocu al hotel, mudámonos y volvimos a La Casa d'Asturies pa cenar. Empezamos el conciertu con munches ganes d'esfrutar. Allegrámonos enforma d'atopanos con xente conocida que viniera d'otros centros asturianos como Miguel Suarez del Centru Asturianu de Tres Cantos y Gonzalo Fernández del Centru Asturianu de Madrid. ¡El futuru de la gaita en Madrid!.
A metá de conciertu vendría la sorpresa de la nueche. Convidamos a la banda de gaites de la Casa d'Asturies de Alcalá, “Na Llende”, a compartir con nós la tema Chalaneru. Siguimos el conciertu y cerramos col mayor de los agradecimientos a la xente de la Casa d'Asturies. Volvió xubir la banda de gaites y cerramos el conciertu con Asturies Patria Quería toos xuntos.
Yera hora de recoyer l'escenariu. Recoyimos tou que nun yera pocu y volvimos cenar na sidrería de La Casa d'Asturies. Yá había ganes de folixa na sidrería. Entá nos dio tiempu de pasar y tocar un par d'elles p'armar baille colos collacios de "Reija".
La presidenta de la Casa d'Asturies, Consuelo Prendes, convidónos a conocer la Casa de Asturies, les sos instalaciones y cuntónos toles actividaes qu'entamen durante l'añu. Regalónos un recuerdu grabau con el nome la Casa d'Asturies. Comentónos lo bien que lo pasaren, lo muncho que bail.laron y cantaron tola nueche. Gracies también a Jesús Álvarez, mayestru de baile tradicional na Casa de Asturies por tar pendiente de todos nosotros y tratanos tan bien.
Al dia siguiente axuntámonos frente a la Casa de Asturias pa despidinos de todos ellos.En despidiéndonos, retomamos la marcha camino d'Asturies.
La Casa d'Asturies de Alcalá de Henares, la so xente y aquella nueche va ser unu de les alcordances más especiales qu'acompañe Boréu. ¡Hasta la próxima!
¡Gracies Alcalá!
No hay comentarios:
Publicar un comentario